ئامېرىكا ئۇچقۇچىسىز ئايرۇپىلان ۋە ئالاھىدە قىسمىنى كۆپەيتمەكچى بولدى
جۇڭگو ئاخبارات تورى 27-يانۋار خەۋىرى: مەركىزىي ئاگېنتلىقنىڭ 27-يانۋاردىكى خەۋىرىگە ئاساسلانغاندا، ئامېرىكا دۆلەت مۇداپىئە مىنىستىرلىكى دۆلەت مۇداپىئە خامچوتىنى ئازايتىش ۋە ئىستىراتېگىيىلىك تەڭشەشكە ماسلىشىش ئۈچۈن، ئۇتۇقلۇق ئېلىپ بېرىلغان تېرورلۇق ھۇجۇمى تەجرىبىلىرىنى چىقىش قىلغان ھالدا، ئۇچقۇچىسىز ئايرۇپىلان قىسمىنى ئاشۇرۇش ۋە يەر شارى مىقياسىدىكى ئالاھىدە قىسمىنى كۆپەيتىش پىلانىنى تۈزۈپ چىققان.
خەۋەردە يەنە ئامېرىكا دۆلەت مۇداپىئە مىنىستىرلىكى ئەمەلدارىنىڭ، دۆلەت مۇداپىئە مىنىستىرلىكىنىڭ خامچوت ھۆججىتىگە ئاساسەن، كەلگۈسى بىر قانچە يىلدا ئۇچقۇچىسىز ئايرۇپىلان ئەترىتىنى %30 ئاشۇرۇش تەلەپ قىلىندى، دېگەن بايانلىرى نەقىل ئېلىنغان.
بۇندىن باشقا، ئامېرىكا يەنە يەرلىك ئىتتىپاقداشلىرى بىلەن ھەمكارلىشىپ، ۋەزىپە ئېلىپ بېرىش پىلانىنى ئىشقا ئاشۇرۇش ئۈچۈن، يەر شارى مىقياسىدىكى ئالاھىدە قىسمىنى كۆپەيتمەكچى بولغان.
بۇلتۇر تېرورلۇق تەشكىلاتى باشلىقى بېن لادىننى ئوڭۇشلۇق تارمار قىلغان ئامېرىكا دېڭىز يىلپىزى ئالاھىدە قىسمى 25-يانۋار يەنە بىر قېتىم ھۇجۇم تەشكىللەپ، سۇمالىدا تۇتقۇن قىلىنغان ئامېرىكا ۋە دانىيىلىك مىنا تەكشۈرۈش گۇرۇپپىسى خادىمىنى ئوڭۇشلۇق قۇتۇلدۇرۇپ چىققان.
دۆلەت مىنىستىرلىكى ئەمەلدارىنىڭ ئېيتىشىچە، گەرچە ئامېرىكا ئاز دېگەندىمۇ سەككىز بېرىگادا ئەسكىرىي كۈچىنى قسىقارتىشنى ئويلىشىۋاتقان بولسىمۇ، ئەمما بۇ بىر قانچە يىل ئىچىدە ئۇچقۇچىسىز ئايرۇپىلان ۋە ئالاھىدە قىسىمنى ئىزچىل كۆپەيتىشكە ئىزچىل مەبلەغ سالىدىكەن.
قۇرۇقلۇق قىسمى بولسا، ئاۋىستىرالىيە قىتئەسىنىڭ دارۋېندىكى يېڭى بازىسىنىڭ كۆۋرۈكلۈك رولى ئارقىلىق شەرقىي جەنۇبىي ئاسىياغا ئىلگىرىلەش مەقسىتىگە يېتىدىكەن.
ئىگىلىنىشىچە، ئامېرىكا دۆلەت مۇداپىئە مىنىستىرلىكى 2015-يىلىدىن بۇرۇن ھازىرقى 63750 ئالاھىدە قىسىم ئەسكىرىنى 70 مىڭغا كۆپەيتىشنى پىلان قىلغان. ئۇندىن باشقا، ئامېرىكا ھاۋا ئارمىيىسى نۆۋەتتە 63 ئۇچقۇچىسىز ئايرۇپىلان چارلاش ئەترىتىگە ئىگە بولۇپ، خەۋەرلەرگە ئاساسلانغاندا، ئامېرىكا دۆلەت مۇداپىئە مىنىستىرلىكى يەنە ئۇچقۇچىسىز ئايرۇپىلان سانىنى كۆپەيتىش ئارقىلىق، 65 ھەتتا 85 چارلاش ئەترىتى قۇرۇشنى ئويلاشقان.
خالىسە ئەھمەد
|
