پاپۇئا يېڭى گېۋىنىيىسىدە ھەربىي ئۆزگىرىش يۈز بەردى

جۇڭگو ئاخبارات تورىنىڭ 26-يانۋار خەۋىرى: چەتئەل ئاخباراتلىرىنىڭ 1-ئاينىڭ 26-كۈنىدىكى خەۋەرگە ئاساسلانغاندا، پاپۇئا يېڭى گېۋىنىيەدىكى بىر گازارما 1-ئاينىڭ 26-كۈنى ئەتىگەندە ھەربىي ئۆزگىرىش قىلغان، پاپۇئا يېڭى گېۋىنىيەنىڭ دۆلەت مۇداپىئە قوماندانى فرانسىس ئاگۋى (Francis Agwi) نەزەربەنت قىلىنغان.

خەۋەرلەرگە ئاساسلانغاندا، 26-يانۋار ئەتىگەندە، سانى ئېنىق بولمىغان ئەسكەرلەر پاپۇئا يېڭى گېۋىنىيەنىڭ پايتەختى مورېسبي پورتى (Port Moresby) غا جايلاشقان دۆلەت مۇداپىئە باش شىتابىغا بۆسۈپ كىرىپ، ھازىرقى باش مىنىستىر پېتىر ئو نېيىل(Peter O'Neill) نى قوللىغۇچى فرانسىس ئاگۋىنى گېنرالنى نەزەبەنت قىلغان. خەۋەردە بىر قېتىملىق تىنچلىق بىلەن ئېلىپ بېرىلغان ھەربىي ئۆزگىرىش ئىكەنلىكى، ئادەم ئۆلۈش ۋە يارىدار بولۇش يۈز بەرمىگەنلىكى دېيىلگەن.

ئاۋسترالىيە بىرلەشمە ئاخبارات ئاگېنتلىقىنىڭ خەۋىرىگە ئاساسلانغاندا، پېنسىيەگە چىققان پولكوۋنىك يائۇرا ساسا (Yaurra Sasa) دۆلەت مۇداپىئە باش شىتابىدا مۇخبىرلارنى كۈتۈۋېلىش يىغىنى ئېچىپ، بۇ قېتىمقى ھەربىي ئۆزگىرىشكە ئۆزى رەھبەرلىك قىلغانلىقىنى جاكارلىغان. ئۇ نەزەربەنت قىلىنغان گېنرال فرانسىس ئاگۋى بىلەن سۆھبەتلەشكەندىن كېيىن، دۆلەت مۇداپىئە ئارمىيىسىنى كونترول قىلغانلىقىنى ئېيتقان.

يائۇرا ساسا:«مېنىڭ ۋەزىپەم ئاساسىي قانۇننىڭ مۇكەممەلىكى ۋە قانۇننىڭ ئادىللىقىنى ئەسلىگە كەلتۈرۈش» دېگەن. ئۇ سابىق باش مىنىستىر مايكول سومارې (Michael Somare) نىڭ يېڭىدىن ۋەزىپىگە ئولتۇرىشىنى تەلەپ قىلغان.

پاپۇئا يېڭى گېۋىنىيىسىنىڭ سابىق باش مىنىستىرى مايكول سومارې 2011-يىلى 8-ئايدىكى پارلامېنتتا ئاۋازغا بېرىشتە سىقىپ چىقىرىلغان. 2011-يىلى 12-ئايدا، پاپۇئا يېڭى گېۋىنىيىسى ئالىي سوتى سومارېنىڭ ۋەزىپىسىنى ئەسلىگە كەلتۈرگەنلىكىنى جاكارلىشى پاپۇئا يېڭى گېۋىنىيىسىدە سىياسىي قاتماللىقنى كەلتۈرۈپ چىقارغان. مايكول سومارې بىلەن پېتىر ئو نىيېل ئىككىلىسىلا ئۆزلىرىنى باش مىنىستىر دەپ ئاتىغان. ئەمما ئەڭ ئاخىرى پېتىر ئو نىيېل سىياسىي كىرزىستا غەلبە قىلغان.

(نەپرەت)