ئافغانىستان ئاممىسى ناتونىڭ قۇرئانغا بىھۆرمەتلىك قىلغانلىقىغا نارازىلىق بىلدۈردى

يەر شارى تورىنىڭ 21-فېۋرال خەۋىرى: ئەنگىلىيە رېيترس ئاگېنتلىقىنىڭ 2-ئاينىڭ 21-كۈنىدىكى ئۇچۇرىغا ئاساسلانغاندا، يېقىندا ئاخباراتلار خەۋەر قىلىپ، ئافغانىستاندا تۇرۇشلۇق چەتئەل قىسىملىرىنىڭ ناتوغرا ئۇسۇلدا زور مىقداردىكى قۇرئان ۋە دىننىي ماتىرىياللارنى بىر تەرەپ قىلغانلىقىنى ئېيتقان، بۇ ئۇچۇر تارقىلىشى بىلەنلا ئافغانىستان خەلقىنىڭ نارازىلىقىنى قوزغىغان، تەخمىنەن 200 نەپەر ئافغانىستان ئاممىسى بۇ قىلمىش توغرىسىدا ئامېرىكا ئارمىيىسىنىڭ ئافغانىستاندىكى بىر ئاساسلىق بازىسىنىڭ سىرتىدا قارشىلىق كۆرسەتكەن. ش ئا ئە ت قۇرئانغا بىھۆرمەتلىك قىلىش ۋەقەسىنى تەلتۆكۈس تەكشۈرەيدىغانلىقىنى بىلدۈرگەن.

رېيترس ئاگېنتلىقىنىڭ دېيىشىچە، ئافغانىستان ئاممىسىدا غەربكە قارشى كەيپىياتنىڭ پەيدا بولىشىدىن ساقلىنىش ئۈچۈن، ش ئا ئە ت نىڭ ئافغانىستاندىكى بىرلەشمە قوشۇنىنىڭ قوماندانى جون ئالېن بۇ ئىشتىن سەمىيمىلىك بىلەن كەچۈرۈم سورايدىغانلىقىنى بىلدۈرگەن.

جون ئالېن:«بىز بۇ قىلمىشتىن خەۋەر تاپقاندىن كېيىن، دەرھال ئارىلاشتۇق ھەمدە ئۇلارنىڭ قۇرئانغا بىھۆرمەتلىك قىلىشىنى توستۇق. دىننىي ئورگان كېلىپ قالغان ماتىرىياللارنى مۇۋاپىق بىر تەرەپ قىلىدۇ» دېگەن. ئۇ بىرلا ۋاقىتتا:«بىز ھازىر بۇ ئىشنى تەكشۈرۈۋاتىمىز، بىرلا ۋاقىتتا بۇ خىلدىكى ۋەقەلەرنىڭ قايتا يۈز بەرمەسلىككە كاپالەتلىك قىلىشقا تەدبىر قوللىنىمىز» دېگەن. ئۇ يەنە بۇ قىلمىشنىڭ ھەرگىزمۇ قەستەن ئەمەسلىكىنى ئېيتقان.

جون ئالېن بۇ ۋەقەنى تەپسىلىي چۈشەندۈرمىگەن، ئەمما ئافغانىستاننىڭ يەرلىك ھۆكۈمىتى ئافغانىستان ئاممىسى توپلىشىۋالغان ئامېرىكا بازىسىدا بەزىلەرنىڭ قۇرئاننى كۆيدۈرگەنلىكىنى بىلدۈرگەن.

2011-يىلى 4-ئايدا، ئامېرىلىق بىر باستېرنىڭ فلورىدا شىتاتىدا قۇرئاننى كۆيدۈرۈشى ئافغانىستان ئاممىسىنىڭ 3 كۈنگە سوزۇلغان قارشىلىق كۆرسىتىش ھەرىكىتىنى كەلتۈرۈپ چىقارغان ئىدى. نامايىشچى ئامما ھەتتا بۇ قىلمىشقا نارازىلىق بىلدۈرۈش ئۈچۈن ب د ت نىڭ ئافغانىستاندا تۇرۇشلۇق ئورگىنىغا ھۇجۇم قىلىپ، 11 ئادەمنىڭ ھاياتىدىن ئايرىلىشىنى كەلتۈرۈپ چىقارغان.

(نەپرەت)